ឈរលើមូលដ្ឋាននេះ កម្ពុជាសម្រេចបាននូវភាពជោគជ័យផ្នែកសេដ្ឋកិច្ចដ៏គួរឱ្យស្ញប់ស្ញែង ដែលរក្សាបាននូវអត្រាកំណើនប្រចាំឆ្នាំជាមធ្យមជាង ៧% មុនពេលការរីករាលដាល នៃជំងឺកូវីដ-១៩។ សន្ទុះនៃកំណើននេះនៅតែបន្ត ទោះបីកំពុងប្រឈមនឹងបញ្ហាសកលនានា ជាមួយនឹងកំណើនព្យាករ សម្រាប់ឆ្នាំ២០២៥ ប្រមាណ ៥,២% និង ៥% សម្រាប់ឆ្នាំ២០២៦។ កម្ពុជាក៏មានបរិយាកាសធុរកិច្ចដែលអាចប៉ាន់ប្រមាណទុកជាមុនបាន ជាមួយនឹងអត្រាអតិផរណា​ដែលអាចគ្រប់គ្រងបាន ស្ថិរភាពនៃអត្រាប្តូររូបិយបណ្ណបរទេស និងអត្រានិកម្មភាពទាប។

វិនិយោគិននៅកម្ពុជាអាចចូលទៅកាន់ទីផ្សារអនុតំបន់មេគង្គ ដែលមានប្រជាជនជាង ៣០០ លាននាក់, ទីផ្សារអាស៊ានដែលមានប្រជាជនសរុបជាង ៦៨៤ លាននាក់ (២០២៤) និងទីផ្សារភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ដែលមានប្រជាជន ២,៣ ប៊ីលាននាក់ និងផលិតផលក្នុងស្រុកសរុប (ផ.ស.ស.) ​ ២៥,៨ ទ្រីលានដុល្លារអាម៉េរិក។ បន្ថែមលើនេះ កម្ពុជាក៏ទទួលបានការអនុគ្រោះពន្ធ និងមិនមានការកំណត់បរិមាណសម្រាប់ការនាំចេញទៅកាន់ទីផ្សារធំៗដូចជា សហភាពអឺរ៉ុប សហរដ្ឋអាម៉េរិក និងចក្រភពអង់គ្លេស តាមរយៈប្រព័ន្ធអនុគ្រោះពាណិជ្ជកម្មដែលផ្តល់ជូនកម្ពុជា ក្នុងនាមជាប្រទេសអភិវឌ្ឍន៍តិចតួច (LDC)។

ជាង ៦០% នៃប្រជាជនកម្ពុជាសរុប មានអាយុក្រោម៣៥ឆ្នាំ។ លើសពីនេះ រាជរដ្ឋាភិបាល បាននិងកំពុងអនុវត្តកម្មវិធីអភិវឌ្ឍជំនាញប្រកបដោយមហិច្ឆតា ដើម្បីផ្តល់ការបណ្តុះបណ្តាលវិជ្ជាជីវៈ និងបច្ចេកទេសដល់យុវជនប្រមាណ ១,៥ លាននាក់ ដែលមកពីគ្រួសារក្រីក្រ និងងាយរងគ្រោះទូទាំងប្រទេស។ វិនិយោគិននឹងមានភាពងាយស្រួល ក្នុងការជ្រើសរើសទេពកោសល្យវ័យក្មេង និងឧស្សាហ៍ព្យាយាម នៅកម្ពុជា រួមផ្សំនឹងកម្លាំងពលកម្មជំនាញដែលមានការទទួលស្គាល់យ៉ាងទូលំទូលាយ។

ក្នុងទិដ្ឋភាពបច្ចេកវិទ្យាឌីជីថលវិញ ការរីកចម្រើនយ៉ាងរហ័សនៃវិស័យនេះនៅកម្ពុជាគឺបានស្តែងចេញយ៉ាងច្បាស់ និងកំពុងផ្លាស់ប្តូរស្ថាប័នសាធារណៈ វិស័យធុរកិច្ច និងការរស់នៅរបស់បុគ្គលម្នាក់ៗ។ រាជធានីភ្នំពេញ ខេត្តបាត់ដំបង ខេត្តសៀមរាប និងបណ្តាខេត្តជាប់ឆ្នេរសមុទ្រ គឺជាចំណុចស្នូលនៃបដិវត្តន៍បច្ចេកវិទ្យានេះ ជាមួយសេវាកម្មឌីជីថលដែលកំពុងលេចឡើងថ្មីៗក្នុងវិស័យនានា។ សេវាទូរស័ព្ទចល័ត នៅកម្ពុជាមានតម្លៃសមរម្យ ហើយប្រព័ន្ធអ៊ីនធឺណិតក៏អាចប្រើប្រាស់បានក្នុងល្បឿនលឿន និងមានការតភ្ជាប់ដ៏គួរឱ្យជឿទុកចិត្ត។ ជាមួយនឹងកំណើនយ៉ាងរហ័សនៃអត្រាប្រើប្រាស់អ៊ីនធឺណិត ទូរស័ព្ទចល័ត និងបណ្តាញសង្គម រាជរដ្ឋាភិបាលកម្ពុជាកំពុងអភិវឌ្ឍយ៉ាងសកម្មនូវភាពត្រៀមខ្លួនរួចជាស្រេច ផ្នែកឌីជីថលរបស់កម្ពុជា និងកំពុងតាក់តែងគោលនយោបាយប្រកបដោយមហិច្ឆតា ដើម្បីប្រែក្លាយកម្ពុជាឈានឆ្ពោះទៅជាប្រទេសសេដ្ឋកិច្ចឌីជីថលក្នុងរយៈពេលវែង។

វិនិយោគិននឹងទទួលបានការលើកទឹកចិត្តផ្នែកពន្ធដ៏អំណោយផល ការធានាការវិនិយោគ និងសាមញ្ញកម្មនីតិវិធីរដ្ឋបាល។ [ចុចទីនេះ] សម្រាប់ព័ត៌មានលម្អិតស្តីពីការលើកទឹកចិត្តផ្នែកពន្ធ។ កម្ពុជា បើកចំហសម្រាប់ភាពជាម្ចាស់ធុរកិច្ចបរទេស និងការបង្វិលដើមទុនទៅបរទេសដោយសេរី។ ជាក់ស្ដែង កម្ពុជាអនុញ្ញាតឱ្យមានកម្មសិទ្ធិបរទេស១០០% ក្នុងវិស័យសំខាន់ៗជាច្រើនលើកលែងតែកម្មសិទ្ធិដីធ្លីប៉ុណ្ណោះ ព្រមទាំងអនុញ្ញាតឱ្យវិនិយោគិនអាចទិញរូបិយបណ្ណបរទេសដោយសេរី និងបង្វិលទៅបរទេសនូវរូបិយបណ្ណ បរទេសទាំងអស់នោះ។ រាជរដ្ឋាភិបាល ប្តេជ្ញាចិត្តយ៉ាងពេញទំហឹងក្នុងការជួយសម្របសម្រួលដល់វិនិយោគិននៅគ្រប់ដំណាក់កាល និងពង្រឹង​កិច្ចសន្ទនា និងភាពជាដៃគូ រវាងរដ្ឋ-ឯកជន។

ទុនវិនិយោគដ៏ច្រើនសន្ធឹកសន្ធាប់ ត្រូវបានប្រើប្រាស់សម្រាប់ការកសាងហេដ្ឋារចនាសម្ព័ន្ធសំខាន់ៗ ដូចជា ផ្លូវល្បឿនលឿន អាកាសយានដ្ឋានអន្តរជាតិ មជ្ឈមណ្ឌលភស្តុភារកម្មចម្រុះ កំពង់ផែ សមុទ្រទឹកជ្រៅ និងបណ្តាញដឹកជញ្ជូនតាមផ្លូវទឹក។ ការអភិវឌ្ឍហេដ្ឋារចនាសម្ព័ន្ធអគ្គិសនី ក៏មានការរីកចម្រើនគួរឱ្យកត់សម្គាល់ផងដែរ ដោយអត្រាថ្លៃអគ្គិសនី ធ្លាក់ចុះគួរឱ្យកត់សម្គាល់ និងសមត្ថភាពផលិតកើនឡើង១៥ដង ក្នុងរយៈពេល ១៥ឆ្នាំចុងក្រោយនេះ។ បន្ថែមលើនេះ តំបន់សេដ្ឋកិច្ចពិសេសជាច្រើន ត្រូវបានបង្កើតឡើងនៅតាមបណ្តាប៉ូលសេដ្ឋកិច្ចសំខាន់ៗនៅកម្ពុជា ដោយមានការតភ្ជាប់ផ្លូវថ្នល់ ផ្លូវដែក ផ្លូវសមុទ្រ និងផ្លូវអាកាស ទៅកាន់មជ្ឈមណ្ឌលពាណិជ្ជកម្មអន្តរជាតិសំខាន់ៗ។ ការវិនិយោគនៅក្នុងតំបន់សេដ្ឋកិច្ចពិសេស ទទួលបានការលើកទឹកចិត្តដូចគ្នាទៅនឹងការវិនិយោគនៅក្រៅតំបន់សេដ្ឋកិច្ចពិសេសដែរ ប៉ុន្តែវិនិយោគិនក្នុងតំបន់សេដ្ឋកិច្ចពិសេសនឹងទទួលបានការសម្របសម្រួលផ្នែករដ្ឋបាលកាន់តែប្រសើរ ព្រមទាំងអត្ថប្រយោជន៍ដែលកើតចេញពីឥទ្ធិពលនៃចង្កោមឧស្សាហកម្ម។